ᐃᒥᐊᓗᒃ, ᓱᐴᖅᑐᖃᑦᑕᕐᓂᖅ, ᐊᒻᒪ ᐋᖓᔮᕐᓇᖅᑑᒪᓂᖅ

ᐃᒥᐊᓗᒃᐸᒃᖢᓂ, ᓱᐴᖅᑐᖅᐸᒃᖢᓂ, ᐊᒻᒪ ᐋᖓᔮᕐᓇᖅᑑᒪᕙᒃᖢᓂ ᑎᒥᑦᑎᓐᓄᑦ ᐊᒃᑐᐃᕐᓘᑕᐅᕙᒃᑐᐃᓐᓇᐅᕗᑦ, ᐃᓱᒪᑦᑎᓐᓄᑦ, ᐊᒻᒪ ᐃᓅᖃᑎᑦᑎᓐᓄᑦ ᖃᓂᒋᔭᑦᑎᓐᓄᑦ.

ᐃᓄᐃᑦ ᐃᒥᐊᓗᒍᒪᓲᖑᕗᑦ, ᓱᐴᑐᕈᒪᓲᖑᕗᑦ, ᐋᖓᔮᕐᓇᖅᑑᒪᔪᒪᓲᖑᕗᑦ ᓲᓪᓗ ᐱᔾᔪᑎᖃᐅᕈᓘᔭᖅᖢᑎᒃ.

  • ᑭᐱᙳᓗᐊᓕᕌᖓᑕ
  • ᓇᓕᒧᖏᓐᓂᒃ ᒪᓕᑐᐃᓐᓇᖅᑐᑦ
  • ᑕᐅᑐᒃᑳᖓᑕ ᖃᑕᙳᑎᖏᓐᓂᒃ ᐱᖃᓐᓇᕆᔭᖏᓐᓂᒡᓗ ᐊᑐᖅᑐᓂᒃ
  • ᐊᒃᓱᕈᕐᓇᖅᑐᒃᑰᕌᖓᑕ ᐋᓐᓂᐊᕌᖓᑕᓗ
  • ᑕᕐᕆᔭᐱᒃᑲᓗᐊᒧᑦ ᑐᓴᕐᓈᐱᒃᑲᓗᐊᒧᓪᓗ ᑕᓚᕖᓴᒃᑯᑦ, ᑕᕐᕆᔮᒃᓴᒃᑯᑦ, ᑐᓵᕐᓈᒐᒃᓴᒃᑯᓪᓗ ‘ᐊᔾᔪᒥᓇᖅᓯᓲᖑᓂᖏᓐᓄᑦ” ᐊᒻᒪ “ᐊᕐᓇᑦᑎᐊᕙᒃᐅᓕᖃᑦᑕᕐᓂᖏᓐᓄᑦ ᐊᖑᑎᑦᑎᐊᕙᐅᓕᖃᑦᑕᕐᓂᖏᓐᓄᓪᓗ”

ᓱᐴᖅᑐᖃᑦᑕᕐᓂᖅ ᐊᒃᑑᑎᔪᓐᓇᖅᑐᖅ ᑎᒥᑦᑕ ᐊᐅᓚᔾᔪᑎᓕᒫᖏᓐᓄᑦ ᖃᔅᓯᑲᓪᓛᓗᖕᓂᓪᓗ ᐋᓐᓂᐊᓕᕈᑎᒋᔪᓐᓇᖅᖢᑎᒍᑦ. ᓱᐴᖅᑐᖅᑎᐅᓪᓗᓂ ᐅᑯᐊ ᐅᔾᔨᕐᓇᓗᐊᙳᐊᓲᑦ:

  • ᑭᒍᑎᑦ ᖁᖅᓱᖅᑎᓯᒪᓪᓗᑎᒃ
  • ᖃᓂᖓ ᐊᓇᕐᓂᓛᕿᓪᓗᓂ
  • ᐅᕕᓂᖓ ᕿᕐᓈᖓᓕᖅᖢᓂ
  • ᐃᒧᓪᓘᓕᖅᖢᓂ
  • ᒪᐅᓇᖏᑦ ᖁᖅᓱᖅᓯᓪᓗᑎᒃ

ᓱᐴᖅᑐᖃᑦᑕᕐᓂᕐᒥᒃ ᑎᐹᖕᓂᓪᓗ ᖃᐅᔨᒃᑲᓐᓂᕈᒪᒍᔅᓯ ᐃᑲᔪᖅᑕᐅᔪᒪᒍᔅᓯᓘᓐᓃᑦ ᓄᖅᑲᕋᓱᒃᑎᓪᓗᓯ ᐅᕗᖓ ᐃᑭᐊᖅᑭᕕᖕᒧᐊᕈᓐᓇᖅᐳᓯ: Nunavut Quits.

ᒪᓕᒐᖅᑎᒍᑦ ᓱᕋᐃᓂᐅᙱᑦᑐᓂᒃ ᐊᒻᒪ ᓱᕋᐃᓂᐅᔪᓂᒃ ᐋᖓᔮᕐᓇᖅᑐᖅᑕᖃᖅᑐᖅ. ᐃᓄᒃ ᓇᓕᐊᖕᓄᑐᐃᓐᓇᖅ ᐅᐃᕆᑦᑐᓐᓇᖅᑐᖅ, ᓄᖅᑲᕋᓱᓕᖅᖢᒋᑦ ᐊᔪᕐᓇᕐᔪᐊᕈᓐᓇᖅᑐᑦ. ᐋᖓᔮᕐᓇᖅᑐᑦ ᐃᓄᖕᓂᒃ ᖁᕕᐊᓱᖅᑰᔨᓕᕐᓇᖅᑐᑦ ᕿᓚᒥᕈᓗᒃ. ᐃᑲᕐᕋᐃᑦ ᐊᓂᒍᖅᐸᓪᓕᐊᑎᓪᓗᒋᑦ, ᐋᖓᔮᖅᑲᐅᔫᒐᓗᐊᖅ ᑲᑕᖓᓕᕈᓐᓇᖅᑐᖅ ᓂᑲᓪᓗᖓᓕᕐᓗᓂᓘᓐᓃᑦ, ᐱᒃᑲᓐᓂᓕᕐᓗᓂᒋᑦ ᖁᕕᐊᓱᒍᑎᒋᒃᑲᓐᓂᕋᓱᒡᓗᓂᒋᑦ. ᖁᕕᐊᓱᒍᒪᒍᕕᑦ, ᐆᒻᒪᕆᒍᒪᒍᕕᑦ, ᐊᐅᓚᓂᖃᑦᑎᐊᕈᒪᒍᕕᓪᓗ, ᐋᖓᔮᕐᓇᖅᑐᑦ ᐱᕙᙱᓪᓗᒋᑦ.
 

ᒪᓕᒐᖅᑎᒍᑦ ᓱᕋᐃᔪᑦ ᐋᖓᔮᕐᓇᖅᑐᑦ ᐆᒃᑑᑎᑦ

  • ᐃᕕᒃ ᓱᐴᖅᑐᒐᖅ
  • ᑎᓯᔪᖅ ᐋᖓᔮᕐᓇ)ᖅᑐᑦ
  • ᐊᐳᑎᐅᑉ ᐊᔾᔨᖓ ᒥᓗᒃᑕᐅᔭᕆᐊᓕᒃ
  • ᐊᐳᑎ
  • ᐋᖓᔮᕐᓇᖅᑐᑦ ᕼᐃᐅᕈᐃᓐ
  • ᓴᙱᔪᑦ ᐋᖓᔮᕐᓇᖅᑐᑦ (ᒥᐊᑕᕕᑕ ᒥᓐ)
  • ᓱᓕᒃᑲᓐᓂᖅ ᓴᙱᔪᖅ ᐋᖓᔮᕐᓇᖅᑐᖅ (ᐃᐊᒃᔅᑕᓯ)

ᒪᓕᒐᖅᑎᒍᑦ ᓱᕋᐃᙱᑦᑐᑦ ᐋᖓᔮᕐᓇᖅᑐᑦ ᐆᒃᑑᑎᑦ

  • ᐋᓐᓂᐊᕕᒃᑎᒍᑦ ᐱᔭᐅᓲᑦ ᐃᓅᓕᓴᐅᑎᑦ (ᐋᓐᓂᐊᖅᑐᒧᑦ ᐄᔭᒐᑦ ᓲᕐᓗ OxyContin)
  • ᓂᐅᕕᕐᕕᒃᑯᑦ ᐃᓅᓕᓴᐅᑎᑦ ᐱᔭᒃᓴᐅᔪᑦ (ᓂᐊᖁᖅᓯᐅᑎᑦ ᑕᐃᓕᓈᓪ, ᓴᓗᒃᑎᓴᐅᑎᑦ ᐄᔭᒐᑦ)

 

ᐋᒃᑳᕈᓐᓇᕐᓂᖅ

ᐋᒃᑳᕆᐊᒃᓴᖅ ᐊᔪᕐᓇᓈᖅᓯᑐᐃᓐᓇᕆᐊᖃᖅᐳᑎᑦ ᐱᖃᓐᓇᕆᔭᑎᑦ ᖃᑕᙳᑎᑎᓪᓘᓐᓃᑦ ᐊᑐᖅᑎᐅᒃᐸᑕ ᐋᖓᔮᕐᓇᖅᑐᓂᒃ, ᐃᕝᕕᓪᓗ ᐱᔪᒪᙱᒃᑲᓗᐊᕐᓗᑎᑦ.

ᐋᒃᑳᕈᒪᒍᔅᓯ ᐅᑯᐊ ᐊᑐᕈᓐᓇᖅᑕᓯ

  • ᐅᖃᑐᐃᓐᓇᕐᓗᑎᑦ−“ᐋᒃᑲ”.
  • ᐱᔭᒃᓴᖃᕐᓂᕋᕐᓗᑎᑦ. “ᐃᓕᓐᓂᐊᕈᑎᒃᑲ ᐊᔪᕈᓐᓃᖅᓴᕆᐊᖃᕋᒃᑭᑦ ᖃᐅᔨᓴᖅᑕᐅᓕᒑᒐᑦᑕ/ᐸᐃᕆᔭᕆᐊᖃᕋᒪ/ᓂᖏᐅᕋ ᐳᓛᕆᐊᕐᓂᐊᕋᒃᑯ. ᐊᑐᕈᓐᓇᙱᓐᓇᒃᑯ ᐃᒥᐊᓗᐊᓂᓵᖅᓯᒪᓗᐊᕋᒪ/ᐋᖓᔮᕐᓇᖅᑑᒫᓂᓵᕋᒪ.”
  • ᐹᑎᖅᑐᓂᒃ, ᐊᓯᐊᓂᒃ ᐃᒥᐊᓘᙱᑦᑐᒥᒃ ᐃᒥᕈᓐᓇᖅᐳᑎᑦ.

ᐅᑯᐊ ᐅᖃᐅᓯᕆᔪᓐᓇᕐᒥᔭᓯ ᑎᓕᐅᖅᑕᐅᓗᐊᕈᔅᓯ

  • ᐅᖃᓲᑦ, “ᑭᒃᑯᓕᒫᑦᑎᐊᑦ ᐋᖓᔮᓲᑦ.”
    ᐅᖃᐅᑎᔪᓐᓇᖅᑕᑎᑦ, “ᐅᓄᖅᑐᒻᒪᕆᐊᓗᐃᑦ ᐋᖓᔮᓲᖑᙱᑦᑐᑦ. ᐅᕙᖓᓯᐅᑕᐅᙱᑦᑐᖅ.”
  • ᐅᖃᓲᑦ, “ᐋᖓᔮᕐᓇᖅᑐᑦ ᐃᓕᖕᓄᑦ ᐊᔪᙱᑦᑐᐊᓘᖅᑰᔨᓐᓇᖅᑐᑦ.”
    ᐅᖃᐅᑎᔪᓐᓇᖅᑕᑎᑦ, “ᐊᔪᙱᑦᑐᐊᓘᕌᓂᖅᑰᔨᔪᖓ. ᓱᕐᕋᒍᑎᒋᔪᒪᙱᖦᖢᒍᓗ.”
  • ᐅᖃᓲᑦ, “ᐱᖃᓐᓇᕆᒍᕕᖓ, ᐋᖓᔮᖃᑎᒋᓂᐊᖅᑕᕐᒪ.”
    ᐅᖃᐅᑎᔪᓐᓇᖅᑕᑎᑦ, “ᐱᐅᒋᑦᑎᐊᖅᑕᒋᑦ. ᐋᖓᔮᕐᓇᖅᑐᑦ ᐱᐅᒋᙱᑐᐃᓐᓇᖅᑕᒃᑲ.”
  • ᐅᖃᓲᑦ, ᐅᓇ ᐋᖓᔮᕐᓇᖅᑐᖅ ᐱᐅᔪᒻᒪᕆᐊᓗᒃ.”
    ᐅᖃᐅᑎᔪᓐᓇᖅᑕᑎᑦ, “ᖃᐅᔨᒪᔭᖃᖅᑐᖓ ᐃᓄᖕᒥ ᐋᓐᓂᐊᓕᓪᓚᕆᓚᐅᖅᑐᒥᒃ ᐋᖓᔮᕐᓇᖅᑑᒫᓪᓚᓚᐅᖅᖢᓂ. ᐱᐅᙱᑦᑎᐊᓚᐅᖅᑐᖅ.”
  • ᐅᖃᓲᑦ, “ᖃᐅᔨᔭᐅᔾᔮᙱᑦᑎᐊᖅᑐᑎᑦ.”
    ᐅᖃᐅᑎᔪᓐᓇᖅᑕᑎᑦ, “ᐅᒡᒍᐊᕈᑎᒃᓴᓐᓂ ᐊᑐᔾᔮᙱᑦᑎᐊᖅᑐᖓ. ᐊᓄᓪᓚᒃᓯᐊᖑᓕᕈᓐᓇᕋᒪ, ᐊᓄᓪᓚᒃᓰᕕᖕᒧᐊᕈᓐᓇᕋᒪᓘᓐᓃᑦ ᐊᖑᔭᐅᑐᐊᕈᒪ.”

ᐱᔭᒃᓴᓂᒃᐸᒡᓗᑎᑦ ᐱᓕᕆᕙᙱᑕᕐᓂᒃ

  • ᐱᓕᕆᕙᙱᑕᕐᓂᒃ ᐱᓕᕆᖔᖅᐸᒡᓗᑎᑦ−ᐅᖃᓕᒫᒐᕐᒥᒃ ᐅᖃᓕᒫᕐᓗᑎᑦ, ᑕᕐᕆᔭᕐᓗᑎᑦ, ᐱᙳᐊᖅᑎᓂᒃ ᐃᓚᐅᓗᑎᑦ ᐅᕝᕙᓘᓐᓃᑦ ᐱᓕᕆᔨᓂᒃ.

ᐃᓕᖕᓂ ᐃᓕᓴᕐᓗᑎᑦ

  • ᖃᐅᔨᓇᓱᒡᓗᑎᑦ ᑐᑭᓯᒋᐊᒐᒃᓴᑦᑎᐊᕙᖕᓂᓪᓗ ᐊᑐᖅᐸᒡᓗᑎᑦ ᐃᓱᒪᓕᐅᒐᓴᑦᑎᐊᕙᖕᓂᒃ ᐃᓱᒪᓕᐅᕆᖃᑦᑕᕐᓂᐊᕋᕕᑦ ᐃᓅᓯᕕᑦ ᒥᒃᓵᓄᑦ. ᖃᐅᔨᒃᑲᓐᓂᕈᓐᓇᖅᑐᑎᑦ ᐅᕗᙵᕐᓗᑎᑦ TeensHealth - Drugs and Alcohol.

ᐃᒥᐊᓗᒃ ᑲᑦᑐᕈᑕᐅᓲᖅ ᖃᔅᓯᑲᓪᓛᓗᖕᓄᑦ ᐱᒻᒪᕆᐅᔪᓄᑦ ᐃᓱᒪᑦᑎᓐᓂ ᑎᒥᑦᑎᓐᓂᓪᓗ ᐊᐅᓚᓂᕆᔭᑦᑎᓐᓄᑦ.

  • ᐃᓱᒪᒃᓴᖅᓯᐅᑦᑎᐊᕐᓇᙱᑦᑐᖅ
  • ᐅᕐᕈᔮᕐᓇᖅᑐᖅ
  • ᓯᖕᓇᑐᓕᕐᓇᖅᑐᖅ
  • ᑕᐅᑐᒃᑕᖏᑦ ᐊᑕᐅᓯᐅᔪᓐᓃᓲᑦ
  • ᖃᓂᖓ ᓄᑭᒃᖠᓪᓗᓂ ᑐᑭᓯᓇᙱᑦᑐᓂᒃ ᐅᖃᓪᓚᓕᕈᓐᓇᖅᑐᖅ
  • ᑐᓵᑦᑎᐊᕈᓐᓃᓲᑦ

ᐃᒥᐊᓗᖕᒧᑦ ᑐᖁᓐᓇᖅᑐᖃᓕᓲᖑᕗᑦ ᐃᒥᐊᓗᒡᔪᐊᖅᓯᒪᓗᐊᖅᖢᓂ.

  • ᒥᕆᐊᖅᓴᕐᔪᐊᓕᖅᖢᓂ
  • ᖃᐅᔨᒪᔪᓐᓃᖅᓯᒪᓪᓗᓂ ᐅᐃᔾᔭᙳᓪᓗᓂᓘᓐᓃᑦ
  • ᐊᓂᖅᑎᕆᒡᒐᓕᖅᖢᓂ
  • ᖀᖅᓱᑲᑕᓕᖅᖢᓂ
  • ᑐᖁᓪᓗᓂ

ᐱᔾᔪᑎᑦ ᐃᒥᐊᓗᒃ ᐊᑐᕆᐊᖃᙱᓐᓂᖓᓂ:

  • ᐅᐃᕆᓐᓇᕐᒪᑦ −ᓲᖑᔪᐊᓘᓕᖅᖢᓂ ᐃᓱᒪᖅᓲᑎᒋᓕᖅᖢᒍᓗ ᐃᒦᓐᓇᕈᒪᓕᖅᖢᒍ, ᓄᖅᑲᕈᓐᓇᐃᓪᓕᓪᓗᒍᓗ ᐱᐅᙱᑦᑐᐃᓐᓇᕐᓂᒃ ᐊᒃᑑᑎᒋᓕᖅᖢᒍ.
  • ᐃᓱᒪᓕᐅᑦᑎᐊᕐᓇᙱᑦᑐᖅ ᑭᖑᓂᐊᒍᓪᓗ ᐅᒡᒍᐊᕈᑎᓕᐅᕐᓇᖅᑐᖅ−ᓴᐳᑎᓯᒪᓇᑎᒃ ᓄᐊᓕᕈᑕᐅᓕᓲᖅ, ᖁᐱᕐᕆᓯᒪᓯᑳᓪᓚᒍᓐᓇᖅᖢᑎᒃ ᐊᒻᒪ ᓯᖓᐃᓕᕈᒪᙱᑦᑑᒐᓗᐊᑦ ᓯᖓᐃᓕᑲᓪᓚᒍᓐᓇᖅᖢᑎᒃ; ᐋᓐᓂᖅᓱᖅᑕᐅᓐᓇᖅᑐᖅ ᑐᖁᓐᓇᖅᑐᕐᓘᓐᓃᑦ ᐱᕐᕈᓗᐊᕿᓂᒃᑯᑦ ᓲᕐᓗ ᐃᒫᒍᑦ ᑭᕕᓗᓂ, ᑎᓴᒪᓕᒃᑯᑦ/ᓯᑭᑑᒃᑯᑦ ᐱᕐᕈᓗᐊᕿᓗᓂ, ᐅᓇᑕᕐᓇᖅᑐᖅ, ᐊᒻᒪ ᐃᒻᒥᓃᕐᓇᖅᑐᖅ.
  • ᐃᓅᓯᕐᒧᑦ ᐱᐅᙱᑦᑎᐊᖅᑐᖅ−ᖁᐃᒃᑎᓐᓂᖅᓴᐅᔪᓐᓇᖅᑐᑦ, ᐊᐅᖏᑦ ᖁᑦᑎᓗᐊᓕᕈᓐᓇᖅᑐᑦ, ᑎᖑᕐᓗᓕᕐᓗᑎᒡᓗ, ᐆᒻᒪᑎᕐᓗᓕᕐᓗᑎᒃ, ᐊᒻᒪ ᐃᓱᒪᖓ ᐃᓚᙵᖅᓯᒪᓕᕐᓗᓂ.
  • ᓯᖓᐃᑎᓪᓗᒋᑦ ᐃᒥᐊᓗᖃᑦᑕᖅᑐᑦ ᓄᑕᕋᓛᖅ ᐃᓗᐊᓃᑦᑐᖅ ᓇᒡᓕᒃᓵᖅᑎᑦᑐᓐᓇᖅᑕᖓ ᐃᒡᓕᐊᖓ ᐃᒥᐊᓗᖕᒧᑦ ᐊᒃᑐᖅᑕᐅᒃᐸᑦ.