ᐊᐃᑉᐸᕇᖕᓂᖅ ᐃᒪᐃᑦᑐᖅ ...

ᐊᐃᑉᐸᖃᕐᓂᖅ ᐃᓚᒋᔭᐅᑐᐃᓐᓇᖅᑐᖅ ᑭᓇᐅᓂᑦᑎᓐᓂ ᐊᐃᑉᐸᖃᖅᑎᐅᑎᓪᓗᑕ. ᐃᓄᓕᒫᑦ ᐊᐃᑉᐸᖃᕈᒪᖃᑦᑕᖅᑐᖅ, ᐊᐃᑉᐸᖃᕈᒪᖃᑦᑕᕐᕈᑎᒃ ᐋᒃᑲᓘᓐᓃᑦ. ᐊᐃᑉᐸᖃᕐᓂᖅ ᑭᓱᓕᒫᖑᒧᖅ ᐅᕙᑦᑎᓐᓂᒃ ᐊᐃᑉᐸᖃᖅᑎᐅᑎᑦᑎᔪᖅ. 

ᑎᒥᐅᑉ ᑭᓱᑯᑦᑎᖏᑦ ᐊᖑᑦ ᐊᕐᓇᕐᓗ ᖃᓄᐃᔾᔪᑎᖏᑦ ᑎᒥᖏᓐᓂ ᐊᐃᑉᐸᖃᕈᓐᓇᕐᓂᕐᒧᓪᓗ ᐃᓗᓕᖏᑦ
ᐊᖒᖕᒪᖔᕐᒥ ᐊᕐᓇᐅᖕᒪᖔᕐᒥ ᖃᐅᔨᒪᓂᖅ ᖃᓄᖅ ᑕᐅᑐᖕᓂᑦᑎᓐᓂ ᐅᕙᑦᑎᓐᓂ; ᐃᒪᓐᓇᐅᓇᓱᒋᓂᓪᓗᐊᑕᖅ ᐊᖑᑕᐅᔪᒍᑦ ᐊᕐᓇᐅᔪᒍᓪᓘᓐᓃᑦ, ᑕᒪᒃᑮ, ᑖᒃᑯᐊᖑᙱᑦᑐᖅ, ᓇᓂᐅᒐᓗᐊᑭᐊᕐᓘᓐᓃᑦ ᐃᓗᓕᖓᓂ ᐊᖑᑕᐅᓂᕐᒧᑦ ᐊᕐᓇᐅᓂᕐᒧᑦ ᐊᔾᔨᒌᖏᑦᑐᑎᒍᑦ
ᐊᖑᑕᐅᖕᒪᖔᑦ ᐊᕐᓇᐅᖕᒪᖔᑦ ᓴᖅᑭᔮᖅᑎᑦᑎᔾᔪᑎ ᖃᓄᐃᓕᐅᖃᑦᑕᕐᒪᖔᑦᑎᓐᓂ, ᐊᓐᓄᕌᖅᓯᒪᓂᕗᑦ, ᐅᖃᓪᓚᖕᓂᖅᐳᓪᓗ ᓴᖅᑭᑎᑦᑎᔪᖅ ᐊᓯᑦᑎᓐᓄᑦ ᑭᓇᐅᖕᒪᖔᑦᑎᓂ
ᐊᐃᑉᐸᕇᖕᓂᕐᒥ ᖃᐅᔨᖃᑎᒌᒍᑎ ᐃᒃᐱᖕᓂᐊᓃᑦ, ᓇᒡᓕᒍᓲᑎᑦᑎᐊᕐᓂᖅ ᐃᓄᒃ ᐃᒃᐱᒋᔭᖓ ᐊᓯᐊᓄᑦ
ᐊᖑᑕᐅᓂᕐᒧᑦ ᐊᕐᓇᐅᓂᕐᒧᑦ ᐃᓕᖅᑯᓯᕆᔭᕆᐊᓕᑦ ᐃᓱᒪᒋᔭᕗᑦ ᖃᓄᖅ ᐃᓕᖅᑯᓯᖃᕆᐊᖃᕆᐊᒃᓴᑦᑎᓐᓂ ᐊᕐᓇᐅᒍᑦᑕ ᐊᖑᑕᐅᒍᑦᑕᓘᓐᓃᑦ
ᐊᐃᑉᐸᕇᖕᓂᕐᒥ ᖃᓄᐃᙱᑦᑎᐊᕐᓂᖅ ᖃᓄᐃᓐᓂᕗᑦ ᑎᒥᒃᑯᑦ, ᐃᓱᒪᒃᑯᑦ, ᐃᓅᖃᑎᒌᓄᓪᓗ ᖃᓄᐃᙱᑦᑎᐊᕐᓂᕐᒥ ᐊᒃᑐᐊᓂᕆᓗᒍ ᐊᐃᑉᐸᖃᕐᓂᖅ; ᑎᒥᑦᑕ ᑕᐅᑦᑐᖓ−ᖃᓄᖅ ᐃᒃᐱᖕᓂᐊᓂᕆᔭᕗᑦ ᑎᒥᑦᓐᓄᑦ; ᐱᖃᓐᓇᕇᒍᓯᖅ ᖃᓂᒋᔭᖃᕐᓂᕐᓗ; ᖃᓄᖅ ᐊᑐᖃᑦᑕᕐᒪᖔᑦᑎᓐᓂ ᐊᒃᑐᐊᓂᖃᕐᓂᒃᑯᑦ, ᐊᒃᑐᖅᓯᓂᒃᑯᑦ, ᓇᒡᓕᖕᓂᕐᒥ, ᐱᑦᑎᐊᕐᓂᕐᒥ, ᖁᕕᐊᓱᑦᑎᐊᕐᓂᕐᒥ, ᓄᒫᓱᖕᓂᕐᒥᒃᓗ

ᓴᖅᑭᑎᖃᑦᑕᖅᑕᕗᑦ ᐊᐃᑉᐸᖃᐅᓯᕗᑦ ᐅᖃᓪᓚᒍᓯᑦᑎᓐᓄᑦ, ᖁᖓᒍᓯᑦᑎᓐᓄᑦ, ᓇᖏᕈᓯᑦᑎᓐᓄᑦ, ᐃᒃᓯᕚᐳᓯᑦᑎᓐᓄᑦ, ᐊᓐᓄᕌᖅᓯᒪᔾᔪᓯᑦᑎᓐᓄᑦ, ᒧᒥᕈᓯᑦᑎᓐᓄᑦ, ᐃᒡᓚᕈᓯᑦᑎᓐᓄᑦ, ᕿᐊᔾᔪᓯᑦᑎᓐᓄᓪᓗ. ᐊᐃᑉᐸᖃᕈᓯᕗᑦ ᐆᒻᒪᑎᑦᑎᓐᓃᑦᑐᖅ ᑮᓇᐅᓂᑦᑎᓐᓂ, ᑭᓱᓂᒃ ᐅᒃᐱᕈᓲᑎᑦᑎᓐᓂ, ᑭᓱᒥᒃ ᐃᒃᐱᒍᓲᑎᑦᑎᓐᓂ, ᖃᓄᕐᓗ ᑭᐅᖃᑦᑕᕐᒪᖔᑦᑎᓐᓂ ᐊᓯᑦᑎᓐᓄᑦ.

ᐊᐃᑉᐸᕇᖕᓂᖅ ᖃᓄᐃᙱᑦᑎᐊᕐᓗᓂ

ᐊᐃᑉᐸᕇᖕᓂᖅ ᖃᓄᐃᙱᑦᑎᐊᕐᓗᓂ ᓇᓃᓐᓂᕆᔭᐃᑦ ᑎᒥᒃᑯᑦ, ᐃᓱᒪᒃᑯᑦ, ᐃᓅᖃᑎᒌᖕᓂᕐᒧᓪᓗ ᖃᓄᐃᙱᑦᑎᐊᕐᓂᖅ ᐊᒃᑐᐊᓂᖃᕐᖢᓂ ᐊᐃᑉᐸᕇᖕᓂᕆᔪᒪᔭᕐᓂ. ᐊᐃᑉᐸᕇᖕᓂᒃᑯᑦ ᖃᓄᐃᙱᑦᑎᐊᕈᕕᑦ, ᐃᖢᕐᕆᔪᑎᑦ ᐊᐃᑉᐸᕇᖕᓂᕆᔪᒪᔭᕐᓂ. ᐋᓐᓂᐊᖃᙱᑦᑐᑎᑦ, ᐱᑦᑎᐊᖅᑕᐅᙱᓐᓂᒦᖏᑦᑐᑎᑦ, ᑲᑉᐱᐊᓱᖕᓂᕐᒦᖏᑦᑐᑎᑦ, ᓱᓕᙱᑦᑐᓂᒃᓗ ᐅᐱᕈᓱᖕᓂᕐᓂ. ᐃᒃᐱᒋᔪᑎᑦ ᓴᐳᒻᒥᓂᕐᓂ ᐃᑲᔪᖅᓱᖅᑕᐅᓂᕐᓂᒃᓗ. 

ᐅᓄᖅᑐᑦ ᐱᔾᔪᑎᑦ ᐱᔪᒪᓕᖅᑎᑦᑎᔪᑦ ᐊᐃᑉᐸᕇᖕᓂᒃᑯᑦ ᖃᓄᐃᙱᑦᑎᐊᕐᓂᕐᒥ. ᐊᑕᐅᓯᖅ ᐱᕕᒃᔪᐊᖅ ᐱᔾᔪᑎ ᑎᒥᐅᑉ ᐋᖅᑭᒃᓯᒪᓂᖓ. ᑎᒥᐅᑉ ᐋᖅᑭᒃᓯᒪᓂᖓ ᖃᓄᖅ ᐃᓄᐃᑦ ᐊᑐᓂ ᑕᑯᓂᖓ ᐃᒃᐱᒋᓂᖓᓗ ᐱᓪᓗᒍ ᑎᒥᒃᑯᑦ ᑎᒥᖓ, ᓇᖕᒥᓂᖅ ᐃᓱᒪᒥᓂᒃ. ᑎᒥᐅᑉ ᐋᖅᑭᒃᓯᒪᓂᖓ ᐱᐅᙱᑦᑐᒃᑯᑦ ᐱᐅᔪᒃᑯᓪᓘᓐᓃᑦ ᐊᒃᑑᑎᖃᕈᓐᓇᖅᑐᖅ ᑭᓱᓂᒃ ᐃᒪᓐᓈᖅᑐᕈᑎᓂᒃ ᐋᖅᑭᖃᑦᑕᖅᑕᑦᑎᓐᓂᒃ ᐱᓪᓗᒍ ᐊᐃᑉᐸᕇᖕᓂᕆᔪᒪᔭᕗᑦ, ᖃᓄᕐᓗ ᐋᖅᑭᒃᓱᖃᑦᑕᖅᑕᑦᑎᓐᓂᒃ. 

ᒪᒃᑯᒃᑐᑦ ᐃᒃᐱᒋᔪᓐᓇᖅᑐᑦ ᐱᐅᙱᓗᐊᕆᓗᑎᒃ, ᓴᓪᓘᖏᓗᐊᕆᓗᑎᒃ, ᑕᑭᙱᓗᐊᕆᓗᑎᒃ, ᓴᙱᖏᓗᐊᕆᓗᑎᒃ, ᑕᐅᑦᑐᒐᒍᑦ ᑎᒥᑦᑎᐊᕆᙱᓐᓇᓱᒋᑐᐃᓐᓇᕆᐊᓕᒃ, ᐊᕐᓇᑑᖓᙱᓗᐊᕐᓂᖅ ᓴᙱᖏᓗᐊᕐᓂᕐᓘᓐᓃᑦ, ᐊᓯᖏᓪᓗ. ᑖᓐᓇ ᐱᐅᙱᑦᑐᖅ, “ᐱᖃᙱᓗᐊᕐᓂᖅ” ᐃᓱᒪᓂᖅ ᐱᑎᑦᑎᔪᓐᓇᖅᑐᖅ ᒪᒃᑯᒃᑐᓂᒃ ᐃᒪᓐᓈᖅᑐᕐᓂᕐᒥ ᐊᑐᕋᔭᙱᑕᒥᓂᒃ ᐊᓯᐊᒍᑦ, ᐱᐅᓂᖅᓴᒥᒃ ᐱᐅᔪᒥᒃ ᑎᒥᐅᑉ ᐋᖅᑭᒃᓯᒪᓂᖓᓂᖃᓚᐅᖅᐸᑕ. ᓈᒻᒪᒐᓱᒋᙱᑦᑐᑦ ᖃᓄᐃᓕᐅᕈᒪᓗᑎᒃᓗ ᐋᖅᑭᒐᓱᒃᓗᒍ ᑕᐃᓐᓇ ᐃᒃᐱᖕᓂᐊᔭᖓ. 

ᐊᓯᖏᑦ ᐱᒻᒪᕿᐅᔪᑦ ᐱᔾᔪᑎᑦ ᐊᒃᑐᐊᓂᓖᑦ ᐊᐃᑉᐸᕇᖕᓂᒃᑯᑦ ᖃᓄᐃᙱᑦᑎᐊᕐᓂᕐᒧᑦ ᐃᓚᐅᑎᑦᑎᔪᑦ ᖃᓄᖅ ᐊᑐᖃᑦᑕᖅᑕᑦᑎᓐᓂᒃ ᐱᖃᓐᓇᕇᒍᓯᕐᓂ, ᓇᒡᓕᒍᓲᑎᓂᕐᓂ,  ᓇᒡᓕᖕᓂᕐᒥᒃᓗ. ᐱᐅᔪᓂᒃ ᐊᑐᖅᓯᒪᓂᖅ ᑐᓂᓯᓯᒪᔪᖅ ᐱᐅᔪᓄᑦ ᐊᐃᑉᐸᕇᖕᓂᕐᒧᑦ ᖃᓄᐃᙱᑦᑎᐊᕐᓂᕐᒥ. ᐱᐅᙱᑦᑐᑦ ᐋᓐᓂᕐᓇᖅᑐᓪᓘᓐᓃᑦ ᐊᑐᕐᓂᑯᑦ ᓲᕐᓗ ᐊᐃᑉᐸᕇᖕᓂᖅ ᐱᑦᑎᐊᖅᑕᐅᙱᓪᓗᓂ ᓱᕋᒃᓯᕐᔪᐊᕈᓐᓇᖅᑐᖅ ᐊᐃᑉᐸᕇᖕᓂᒃᑯᑦ ᖃᓄᐃᙱᑦᑎᐊᕈᑎᑦᑎᓐᓂ. ᑖᓐᓇ, ᐅᑎᕈᑎᒋᓗᒍ, ᐊᑯᓂᐅᔪᒃᑯᑦ ᐊᒃᑑᓂᓖᑦ ᐊᓯᖏᓐᓂ ᐃᓚᒋᔭᖏᓐᓂ ᐃᓅᓯᑦᑎᓐᓂ. ᐊᒃᑑᑎᔪᑦ ᐃᓕᓐᓂᐊᕆᐊᖅᑎᑕᐅᓂᑯᕕᓂᕐᓄᑦ ᑐᑭᓕᐅᕈᑎᓪᓚᑦᑖᖑᒧᑦ ᑖᔅᓱᒧᖓ. 

ᐱᒻᒪᕿᐅᔪᖅ ᐊᐃᑉᐸᕇᖕᓂᖅ ᖃᓄᐃᙱᑦᑎᐊᕐᓂᖅ, ᐊᐃᑉᐸᕇᒍᓯᕗᑦᐆᒻᒪᑎᑦᑎᓐᓃᒻᒪᑦ ᑭᓇᐅᓂᑦᑎᓐᓂ, ᑭᓱᓂᒃ ᐅᒃᐱᕆᔭᑦᑎᓐᓂ, ᑭᓱᓂᒃ ᐃᒃᐱᒋᔭᑦᑎᓐᓂ, ᖃᓄᕐᓗ ᑭᐅᒋᐊᖃᑦᑕᕐᒪᖔᑦᑎᓐᓂᒃ ᐊᓯᑦᑎᓐᓄᑦ.