ᕿᑐᕐᙵᖅᑖᑐᐃᓐᓇᕆᐊᖃᓕᖅᐳᖔ?

ᓄᑕᕋᓛᖃᕐᓂᖅ ᐊᖏᓪᓗᓂ ᐃᓱᒪᒃᓴᖅᓯᐅᕈᑎᐅᕗᖅ. ᓄᑕᕋᓛᖅ ᐊᖏᔪᐊᓗᖕᒥᒃ ᐊᒃᑑᑎᓕᒃ ᐃᓅᓯᕐᓂ. ᓇᓕᐊᒃᑯᑐᐃᓐᓇᖅ ᓄᑕᕋᓛᖃᕈᕕᑦ ᐊᐃᑉᐸᖃᕐᓗᑎᑦ ᐃᓄᑑᓗᑎᓪᓘᓐᓃᑦ, ᐅᑯᐊ ᑕᒡᕙ ᑭᓱᒃᑭᐊᖅ ᐃᓱᒪᒋᔭᒃᓴᑦ.

ᐊᐃᑉᐸᕋᓗ ᐅᕙᖓᓗ ᓴᙱᔪᒥᒃ, ᓇᒡᓕᒌᒍᑎᔪᒥᒃ, ᖁᕕᐊᓱᒃᑐᒥᒃᓗ ᐊᐃᑉᐸᕇᖕᓂᖃᕐᐱᓄᒃ? ᓴᙱᔪᒥᒃ ᓇᒡᓕᒍᓲᑎᔪᒥᒃᓗ ᐃᑲᔪᖅᑕᐅᓂᕐᒥ ᐊᑐᖃᑦᑕᖅᐳᖓ? 

ᓄᑕᕋᓛᑦ ᑕᖃᑎᑦᑎᔪᓐᓇᖅᑐᑦ ᖃᓄᑐᐃᓐᓇᖅ ᐊᐃᑉᐸᕇᒍᑎᓂᒃ. ᓄᑕᕋᓛᑦ ᑲᒪᒋᔭᐅᖏᓐᓇᕆᐊᓕᑦ ᖃᖓᑐᐃᓐᓇᑦᑎᐊᒃᑯᑦ ᐃᑲᕐᕋᒃᑯᑦ ᐅᓪᓗᖓᓂ ᐅᓐᓄᐊᖓᓂᒃᓗ. ᑖᓐᓇ ᐱᑎᑦᑎᔪᓐᓇᖅᑐᖅ ᑕᖃᓂᕐᒥᒃ, ᐃᓗᐊᓃᒃᑲᓗᐊᕐᓗᓂ ᓴᙱᔪᒥᒃ ᖃᓄᐃᕈᓘᔭᙱᑦᑐᒥᒃᓗ ᐊᐃᑉᐸᕇᖕᓂᕐᒥ. 

ᓄᑕᕋᓛᖃᕈᕕᑦ ᐃᓄᑑᓗᑎᑦ, ᐱᖃᕆᐊᖃᖅᑐᑎᑦ ᓴᙱᔪᒥᒃ ᓇᒡᓕᒍᓱᖕᓂᓕᖕᒥᒃᓗ ᐃᑲᔪᖅᓱᖅᑕᐅᓂᕐᒥ ᐊᑐᖃᑦᑕᕐᓂᕐᒥᒃ− ᐱᖃᓐᓇᕆᔭᑎᑦ ᖃᑕᙳᑎᑎᓪᓗ ᐃᑲᔪᕈᓐᓇᖅᑐᓂᒃ ᐃᑲᔪᖅᓱᐃᓗᑎᒃ ᐃᓕᖕᓂᒃ ᓄᑕᕋᓛᕐᓂᒃᓗ. 

ᐱᔪᓐᓇᖅᐳᖔ/ᐱᔪᓐᓇᖅᐱᑖ ᐱᑎᓪᓗᒍ ᓄᑕᕋᓛᖅ? 

ᓄᑕᕋᓛᑦ ᐱᔭᕆᐊᖃᕐᒪᑕ ᖁᕕᐊᓱᒃᑐᓂᒃ, ᖃᓄᐃᙱᑦᑎᐊᖅᑐᓂᒃ, ᐊᑦᑕᕐᓇᙱᑦᑐᓂᒃᓗ ᐊᖏᕐᕋᒥᒃ. ᐱᔭᕆᐊᖃᖅᑐᑦ ᐋᓐᓂᐊᖃᕐᓇᙱᑦᑐᓂᒃ ᓂᕿᓂᒃ, ᖁᐃᖏᓕᓴᕐᓂᒃ, ᐱᙳᐊᓂᒃ, ᐊᒻᒪ ᐊᓐᓄᕌᓂᒃ. ᐊᖓᔪᖅᑳᑦ ᑮᓇᐅᔭᓕᐅᑦᑎᐊᕆᐊᖃᖅᑐᑦ ᐱᔪᓐᓇᕐᓗᓂᒋᑦ ᑖᒃᑯᐊ ᐱᖁᑎᑦ.

ᓄᑕᕋᓛᑦ ᐱᕕᒃᓴᖃᕐᕕᐅᖏᓐᓇᕆᐊᓕᑦ ᐆᒻᒪᕆᖕᓂᖃᑦᑎᐊᕐᓗᑎᒃᓗ. ᐃᓅᓯᕐᓂ ᐊᑐᖃᑦᑕᖅᑕᕐᓂ ᐊᓯᖏᓐᓂᒃᓗ ᑐᓂᓯᒪᑦᑎᐊᕈᑎᓂᒃ ᐱᑎᑦᑎᓯᒪᕚᑦ ᐱᕕᖃᕐᓂᕐᒥᒃ ᐆᒻᒪᕆᖕᓂᕐᒥᒃᓗ ᐱᔭᕆᐊᖃᕐᑕᕐᓂᒃ ᓄᑕᕋᓛᕐᓄᑦ? 

ᐅᕙᖓ/ᐅᕙᒍᒃ ᐱᕙᒌᔭᖅᓯᒪᕕᑖ ᐊᖅᑯᑎᒃᓴᖓᓄᑦ ᐃᓅᓯᖅ ᐊᓯᔾᔨᕈᑎᒃᓴᖏᓐᓄᑦ ᓄᑕᕋᓛᖃᕐᓗᓂ? 

ᐃᓅᓯᖅ ᐊᓯᔾᔨᓲᖅ ᓄᑕᕋᓛᖃᕐᓗᓂ. ᐊᖓᔪᖅᑳᑦ ᐱᕕᖃᙱᓐᓂᖅᓴᐅᓲᑦ ᐊᓯᖏᓐᓄᑦ ᐱᔭᒃᓴᓄᑦ−ᐱᖃᓐᓇᕆᔭᖏᓐᓄᑦ, ᐱᙳᐊᓗᕿᓂᕐᓄᑦ, ᓯᓂᖕᓂᕐᓄᑦ, ᐊᖏᕐᕋᒥᒃᓗ ᐱᓕᕆᔭᕆᐊᖃᖅᑕᖏᓐᓄᑦ ᐃᓕᓐᓂᐊᕕᓕᕆᔾᔪᑎᓂᒃ. ᐊᖓᔪᖅᑳᑦ ᑮᓇᐅᔭᖃᙱᓐᓂᖅᓴᐅᓕᓲᑦ ᐊᑐᕈᓐᓇᖅᑕᖏᓐᓂᒃ ᓇᖕᒥᓂᕐᒧᑦ. ᐊᕐᓇᐃᑦ ᐊᑐᖃᑦᑕᖅᑐᑦ ᐅᓄᖅᑐᓄᑦ ᑎᒥᒃᑯᑦ ᐊᓯᔾᔨᕈᑎᓄᑦ ᕿᑐᕐᖓᒃᓴᖃᖅᑎᓪᓗᒋᑦ− ᐊᓇᕈᓐᓇᐃᓪᓕᓂᖅ, ᕿᑎᕐᓗᖕᓂᖅ, ᖁᐃᙱᑦᑕᐃᓕᒪᓂᖅ ᐃᒡᓚᓕᕌᖓᑕ, ᖁᐃᖅᓱᓕᕌᖓᑕ, ᑕᒋᐅᒃᑳᖓᑕᓘᓐᓃᑦ. ᐃᓚᖏᑦ ᐊᕐᓇᑦ ᐊᑐᖃᑦᑕᖅᑐᑦ ᐱᓗᐊᙱᑦᑐᒥᒃ ᓄᒫᓱᖕᓂᕐᒥᒃ ᐃᕐᓂᓚᐅᖅᑎᓪᓗᒋᑦ.

ᑕᒪᒃᑮ ᐊᖓᔪᖅᑳᒃ ᐃᒃᐱᖕᓂᐊᓲᑦ ᐅᓄᖅᑐᓂᒃ ᑲᑎᙵᙱᑦᑐᓂᒃ ᐃᒃᐱᖕᓂᐊᓂᕐᓂᒃ− ᖁᕕᐊᓱᖕᓂᖅ, ᑲᑉᐱᐊᓱᖕᓂᖅ, ᐊᑲᐅᒍᓱᖏᓐᓂᖅ, ᖁᕕᐊᑦᑕᓗᐊᕐᓂᖅ, ᓯᕘᕋᓂᖅᓗ.