ᑖᓐᓇ ᐊᐱᖅᑯᑎ ᐃᒡᕕᑐᐊᑦᑎᐊᖅ ᑭᐅᔪᓐᓇᖅᑕᐃᑦ. ᐃᑲᔪᕐᓂᖃᕋᔭᖅᑐᖅ ᐅᖃᓪᓚᖃᑎᖃᕈᕕᑦ ᑕᑎᒋᔪᓐᓇᖅᑕᕐᓂᒃ-ᖃᑕᙳᑎᖕᓂᒃ, ᐱᖃᓐᓇᕆᔭᕐᓂᒃ, ᐋᓐᓂᐊᖅᑐᓕᕆᔨᒥᒃ, ᐃᓄᓕᕆᔨᒥᒃ, ᑭᓇᑐᐃᓐᓇᕐᒥᓪᓘᓐᓃᑦ ᐃᓕᖕᓂᒃ ᐃᒃᐱᒍᓱᒃᑐᒥᒃ.
ᐃᓕᖕᓂᒃ ᐊᐱᖅᓱᕈᓐᓇᖅᐳᑎᑦ ᐃᒪᓐᓇ; ᐃᓱᒪᒃᓴᖅᓯᐅᕈᑎᒋᑦᑎᐊᕈᒃ ᐊᐃᑉᐸᕇᖃᑎᖃᕐᓂᖅ ᖃᓄᖅ ᐃᓕᖕᓄᑦ ᑐᑭᖃᕐᒪᖔᑦ.
ᐊᐃᑉᐸᕇᖃᑎᖃᕈᒪᒐᓗᐊᖅᐳᖔ?
ᐊᐃᑉᐸᕇᖕᓂᖅ ᑎᒥᒃᑯᑦ ᖃᓄᐃᓕᐅᕐᓂᐅᑐᐃᓐᓇᙱᑉᐳᖅ. ᐃᒃᐱᒍᓱᖕᓂᐅᕗᖅ, ᐃᓱᒪᓂᐅᓪᓗᓂ ᐱᔪᒪᓂᐅᓪᓗᓂᓗ ᐊᑲᐅᓯᕚᓪᓕᕐᓇᖅᖢᓂ. ᐃᓛᓐᓂᒃᑯᑦ ᐊᐃᑉᐸᕇᖕᓂᖅ ᐊᑲᐅᙱᑦᑐᒃᑰᓕᕐᓇᖅᐳᖅ, ᐱᓗᐊᖅᑐᒥ ᓱᓕ ᓄᓕᐊᖃᑎᖃᕆᐊᖃᙱᓐᓂᕈᕕᑦ ᐅᕝᕙᓘᓐᓃᑦ ᓱᓕ ᓄᓕᐊᖃᑎᖃᕈᒪᓐᓂᙱᒃᑯᕕᑦ. ᐃᕝᕕᑦ ᐃᓱᒪᓕᐅᕈᑎᒋᔪᓐᓇᖅᐸᐃᑦ ᐊᐃᑉᐸᕇᖃᑎᖃᕈᒪᒍᕕᑦ ᐋᒃᑲᓘᓐᓃᑦ. ᖃᐅᔨᒫᓂᓪᓚᕆᙱᒃᑯᕕᑦ, ᐋᑳᕈᕕᑦ ᓈᒻᒪᖕᓂᖅᓴᐅᕗᖅ. ᐊᐃᑉᐸᕆᔭᐃᑦ ᐱᑐᐃᓐᓇᕆᐊᖃᓕᙱᑉᐸᑦ ᐃᒃᐱᒋᑦᑎᐊᕐᓗᒍ. ᐃᓕᖕᓄᑦ ᓱᓕᑦᑎᐊᕋᓱᒃᓗᑎᑦ, ᐊᓯᖕᓄᑦ ᑎᓕᐅᖅᑕᐅᓇᓱᙱᖔᕐᓗᑎᑦ.
ᖃᓄᐃᒻᒪᑦ ᐊᐃᑉᐸᕇᖃᑎᖃᕈᒪᕗᖓ?
ᐊᐃᑉᐸᕇᖃᑎᖃᕈᒪᓂᖅ ᓇᖕᒥᓂᖅ ᐃᓱᒪᓕᐅᕈᑎᒋᔭᕆᐊᖃᖅᐸᐃᑦ. ᐃᓄᐃᑦ ᓇᖕᒥᓂᖅ ᐱᔾᔪᑎᒃᓴᖃᖅᑐᐃᓐᓇᐅᕗᑦ ᐊᐃᑉᐸᕇᖃᑎᖃᕈᒪᓗᑎᒃ ᐃᓱᒪᓕᐅᕆᔪᒪᒍᑎᒃ.
ᐱᔾᔪᑎᒋᔭᑎᑦ ᐊᐃᑉᐸᕇᖃᑎᖃᕈᒪᓂᕐᒧᑦ ᑕᒡᕙᓂ ᑎᑎᕋᖅᓯᒪᒃᐸᑕ, ᐃᓱᒪᒃᓴᖅᓯᐅᒃᑲᓐᓂᕈᒪᓇᔭᖅᐳᑎᑦ. ᑖᒃᑯᐊ ᐱᔾᔪᑎᒃᓴᑦᑎᐊᕙᐃᓐᓇᐃᕗᑦ ᐊᐃᑉᐸᕇᖃᑎᖃᕈᒪᙱᓐᓂᕐᒧᑦ. ᐃᓕᖕᓂᒃ ᐃᒃᐱᒋᑦᑎᐊᕐᓗᑎᑦ ᐊᐃᑉᐸᐃᓪᓗ ᐃᒃᐱᒋᑦᑎᐊᕐᒥᓗᒍ, ᐅᑕᖅᑭᓗᑎᓪᓗ ᑭᓯᐊᓂ ᖃᐅᔨᒪᑦᑎᐊᓕᕈᕕᑦ ᐊᐃᑉᐸᕇᖃᑎᖃᕈᒪᓂᕐᓂᒃ.
- ᐃᓄᑑᓗᐊᖃᑦᑕᕈᕕᑦ
- ᐋᖓᔮᕈᕕᑦ ᓱᓐᓂᐅᒪᒍᕕᓪᓘᓐᓃᑦ
- ᐊᓯᖕᓂᒃ ᐱᖁᔭᐅᒍᕕᑦ
- ᐊᓯᖕᓄᑦ ᐊᑭᓕᒃᓴᐃᕆᐊᖃᕋᓱᒋᒍᕕᑦ; ᐊᑭᓕᒃᓴᖃᕐᕕᐅᓇᓱᒋᒍᕕᑦ
- ᐊᓯᓕᒫᑎᓪᓕ ᓄᓕᐊᖃᑎᖃᖃᑦᑕᕋᓱᒋᒍᕕᒋᑦ; ᐊᔾᔨᒋᔭᐅᑐᐃᓐᓇᕈᒪᓗᑎᑦ ᐅᕝᕙᓘᓐᓃᑦ ᖃᐅᔨᒪᔭᐅᑦᑎᐊᓕᕐᓗᑎᑦ
- ᐃᓐᓇᐅᓕᕐᓂᓐᓂᒃ ᓇᓗᓇᐃᖅᓯᔪᒪᓗᑎᑦ-ᐃᓕᖕᓄᑦ, ᐱᖃᓐᓇᕆᔭᕐᓄᑦ ᐊᖓᔪᖅᑳᓐᓄᓪᓘᓐᓃᑦ
- ᐃᓄᖕᓂᒃ ᐊᐃᑉᐸᕇᖑᐊᖅᑐᓂᒃ ᑕᕐᕆᔭᖃᑦᑕᕈᕕᑦ ᑕᐃᒪᐃᓕᐅᖃᑕᐅᔭᕆᐊᖃᕋᓱᒋᓕᕐᓗᑎᓪᓗ
- ᐊᐃᑉᐸᐃᑦ ᐊᐃᑉᐸᕇᖃᑎᒋᖃᑦᑕᕈᕕᐅᒃ ᓇᒡᓕᒋᔭᐅᓕᕐᓂᐊᕋᓱᒋᓗᑎᑦ
- ᓄᑕᕋᓛᖃᓕᕈᕕᑦ ᐊᓕᐊᓇᐃᓐᓂᐊᕋᓱᒋᓗᒍ ᓄᑕᕋᓛᑯᓗᐃᓪᓗ ᓇᒡᓕᒃᑎᒌᓕᕐᓗᓯ
- ᑕᑯᑎᑦᑎᔪᒪᒍᕕᑦ “ᐅᒃᐱᕆᔭᐅᔪᓐᓇᕐᓂᓐᓂᒃ”
- ᐋᒃᑳᕆᐊᒃᓴᖅ ᑲᑉᐱᐊᓱᒃᑯᕕᑦ
- ᓄᑕᕋᓛᖅᑖᕈᕕᑦ ᐱᖃᓐᓇᕆᔭᐃᑦ ᑲᑎᙵᖃᑎᒌᓐᓇᕐᓂᐊᕋᓱᒋᓗᒍ
- ᑐᓂᕐᕈᓯᐊᕐᒥᒃ ᑮᓇᐅᔭᒥᒡᓘᓐᓃᑦ ᑐᓂᔭᐅᒍᕕᑦ
- ᑭᓇᑐᐃᓐᓇᕐᒧᑦ ᐊᐃᑉᐸᕆᔭᐅᒍᕕᑦ ᖃᓄᑐᐃᓐᓇᖅ ᐱᓕᕆᔾᔪᔾᔭᐅᓂᐊᕐᓂᕋᖅᑕᐅᓗᑎᑦ
- ᑭᓇᑐᐃᓐᓇᕐᒥᒃ ᐋᓐᓂᖅᓯᔪᒪᓗᑎᑦ ᐅᕝᕙᓘᓐᓃᑦ ᐊᑭᒋᐊᕈᒪᓗᑎᑦ