ᐊᔾᔨᒌᖏᑦᑐᑦ ᖃᓄᐃᓕᖓᓂᖏᑦ ᐱᖃᓐᓇᕇᒍᓰᑦ

ᐃᒃᐱᒍᓱᑦᑎᐊᕐᓂᖅ

ᑎᒥᒃᑯᑦ ᐱᓂᕐᓗᖕᓂᖅ

ᐃᒃᐱᖕᓂᐊᓂᒃᑯᑦ ᐱᓂᕐᓗᐃᓂᖅ

ᑖᓐᓇ ᐊᑐᖃᑦᑕᖅᑐᖅ ᐅᓄᖅᑐᒃᑯᑦ ᐋᖅᑭᒃᓯᒪᔪᑎᖑᑦ ᓯᕘᕋᓵᕆᕐᔪᐊᕈᓐᓇᕐᖢᓂᓗ. ᐊᒃᓱᕈᕐᓇᕐᓂᖅᓴᖅ ᑕᑯᓪᓗᓂ ᖃᐅᔨᔾᔪᑎᓂᒃ ᐃᒃᐱᖕᓂᐊᓂᒃᑯᑦ ᐱᓂᕐᓗᒃᑕᐅᔪᓂ ᓲᖃᐃᒻᒪ ᐃᓄᒃ ᓱᙴᔭᙱᑦᑐᖅ, ᑭᓕᖅᓯᒪᖏᑦᑐᖅ, ᓇᐱᓯᒪᙱᑦᑐᖅ, ᕿᓕᕈᖃᙱᑦᑐᕐᓘᓐᓃᑦ. 

• ᐱᓂᕐᓗᒃᑎ ᐃᕆᐊᓛᖅᐸᒃᖢᓂ ᐊᓯᐊᓄᑦ ᐃᓄᖕᒧᑦ, ᐊᑦᑎᕐᓘᑎᕐᐸᒃᖢᓂᐅᒃ, ᒥᑕᐅᑎᒋᓪᓗᓂᐅᒃᓘᓐᓃᑦ.
  “ᑐᑭᖃᑦᑎᐊᙱᑦᑐᕈᓘᔪᑎᑦ ᐱᐅᙱᓪᓛᓗᒃᖢᑎᓪᓗ! ᐊᓯᒥ ᓇᒡᓕᒋᔾᔮᖏᑖᑎᑦ!” 

• ᐱᓂᕐᓗᒃᑎ ᑲᑉᐱᐊᓵᕆᓪᓗᓂ ᐋᓐᓂᖅᓯᓂᐊᕐᓂᕐᒥᓂᒃ ᐊᓯᐊᓂ ᐃᓄᖕᒥᒃ, ᓇᒡᓕᒋᓛᖏᓐᓂ, ᐃᖕᒥᓂᒃᓘᓐᓃᑦ.
  “ᕿᒪᒃᑯᕕᖓ, ᐃᖕᒥᓂᒃ ᐋᓐᓂᕐᓂᐊᖅᑐᖓ!”
  “ᐱᖁᔭᓐᓂᒃ ᐱᙱᒃᑯᕕᑦ, ᑭᒃᑯᓕᒫᑦ ᐅᖃᐅᑎᓂᐊᖅᑕᒃᑲ ᑐᓴᖅᑕᐅᖁᓯᒪᙱᑕᓕᒫᕐᓂ!” 

• ᐱᓂᕐᓗᒃᑎ ᓄᖅᑲᖅᑎᑦᑎᓗᓂ ᐊᓯᐊᓂ ᐃᓄᖕᒥ ᑕᑯᖃᑦᑕᖁᔨᙱᓪᓗᓂ ᐱᖃᓐᓇᕆᔭᖏᓐᓂ, ᐅᖃᐅᑎᕙᒃᓗᒍ ᖃᓄᖅ ᐊᓐᓄᕌᖅᓯᒪᔭᕆᐊᒃᓴᖅ, ᒪᓕᑲᑕᒃᐸᒃᓗᓂ, ᐅᖃᓗᒃᕕᒌᓐᓇᐅᔭᕐᓗᒍ, ᐱᕕᖃᖅᑎᑦᑎᙱᓪᓗᓂ ᐃᓄᑑᓂᕐᒥ.
  “ᓇᒡᓕᒋᒍᕕᖓ, ᑕᑯᖃᑦᑕᕈᓐᓃᕋᔭᖅᑕᑎᑦ ᐱᖃᓐᓇᕆᔭᑎᑦ ᖃᑕᙳᑎᑎᓪᓗ, ᐅᕙᖓᑐᐊᖑᔪᖅ ᐱᓯᒪᔭᕆᐊᖃᕐᑕᕐᓂ.”
  “ᑭᓇᒥᒃ ᐱᐅᒃᓴᖅᑎᑦᑎᓇᓱᒃᐱᑦ ᑖᔅᓱᒧᖓ ᐊᕐᓇᙴᔾᔪᑎᒧᑦ? ᐊᓯᐊᓂᒃ ᐊᑎᔭᖅᑐᕆᑦ!” 

• ᐱᓂᕐᓗᒃᑎ ᓯᖕᓇᓗᐊᒪᔮᓲᖅ ᖃᓄᐃᓕᐅᓲᕐᓘᓐᓃᑦ ᐊᓯᐊ ᐃᓄᒃ ᓯᖕᓇᑎᓐᓇᓱᒃᖢᒍ. 

ᑮᓇᐅᑎᒍᑦ ᐱᓂᕐᓗᖕᓂᖅ

ᐃᓄᒃ ᐊᓯᒥᓂᒃ ᑮᓇᐅᔭᖅᑖᕈᑎᖃᖅᑎᑦᑎᓇᓱᙱᖦᖢᓂ; ᐱᓗᐊᖅᑐᒥ ᑮᓇᐅᔭᖃᙱᓗᐊᖅᑎᑦᑎᓪᓗᓂ ᐊᕕᖁᓇᒍ ᐱᒋᔭᖓᓂᒃ.

• ᐱᓂᕐᓗᒃᑎ ᐊᐅᓚᑦᑎᓲᖅ, ᑮᓇᐅᔭᒃᑯᕕᖕᒥ, ᐊᖅᓵᖅᖢᒍ ᐊᓯᐊᑕ ᐃᓅᑉ ᐊᑭᓕᖅᑕᐅᔾᔪᑎ ᑮᓇᐅᔭᒃᓴᖓᓂᒃ, ᐊᑐᕐᓂᕐᓗᒃᖢᓂᓗ ᑮᓇᐅᔭᓂᒃ−ᐸᑦᑕᒃᖢᓂ, ᐊᑭᓖᕙᙱᖦᖢᓂ ᐊᑭᓕᒐᒃᓴᓂᒃ. 

ᖃᕋᓴᐅᔭᒃᑯᑦ ᐱᓂᕐᓗᖕᓂᖅ

ᕙᐃᔅᐳᒃ, ᐃᓐᔅᑕᒍᕌᒻ, ᐃᕐᖐᓐᓈᖅᑎᑦᑎᓂᒃᑯᓪᓗ ᑐᓴᖅᑎᑦᑎᔾᔪᑎᒥᒃ ᐊᔪᕐᓇᙱᑦᑐᑯᓘᑎᑦᑎᔪᖅ ᐊᒃᑐᐃᓗᓂ ᐱᖃᓐᓇᕆᔭᖏᓐᓂ ᖃᑕᙳᑎᖏᓐᓂᒃᓗ. ᐊᔪᕐᓇᙱᑦᑐᑯᓘᑎᑦᑎᖕᒥᔪᑦ ᐊᑐᕐᓗᑎᒃ ᖃᕋᓴᐅᔭᓂᒃ ᐱᓂᕐᓗᒃᓗᑎᒃ ᐃᓄᖕᓂᑦ. ᑭᓇᑭᐊᖅ ᐃᓯᕈᑎᓪᓗᓂ ᐊᓯᐊᑕ ᓇᖕᒥᓂᕆᔭᖓᓄᑦ−ᖃᐅᔨᒋᐊᖅᐸᒃᖢᒍ ᐅᖃᓘᑎᖓ ᐃᓄᖕᓄᓪᓗ ᐱᕙᓪᓕᐊᔪᖏᑦ. 

• “ᑭᓇᐅᖕᒪ ᒪᓐᓂ? ᖃᓄᐃᒻᒪ ᐊᖑᑦ ᐱᐅᒃᓴᐃᓐᓇᐅᔭᖅᐸ ᕙᐃᔅᐳᒃᒥ ᐊᔾᔨᐊᖑᐊᖁᑎᖕᓂ?” 
• ᖃᐅᔾᔪᒃ ᐅᖃᓘᑎᕕᑦ ᒪᒃᐱᕈᑎᖓ.” “ᖃᓄᐃᒻᒪᑦ?” “ᖃᓄᐃᒻᒪᐅᙱᑦᑐᖅ? ᐃᔨᖅᓯᒪᔭᖃᕋᕖᑦ?”
• “ᐱᖃᑎᒪ ᓇᒃᓯᐅᔾᔨᕕᒋᓵᑦᑎᐊᖅᑖᖓ ᐅᒥᖓ ᐊᓐᓄᕌᖃᙱᑦᑐᒥᒃ ᐊᔾᔨᖑᐊᒥᒃ. ᓇᒃᓯᐅᑎᓂᐊᖅᑕᕋ ᐱᖃᓐᓇᕆᔭᓕᒫᓐᓄᑦ!” “ᖃᐅᔨᒪᕚ?” “Hᐊ hᐊ ᐋᒃᑲᑦᑎᐊᒻᒪᕆᒃ!”

ᑐᓂᓯᖃᑦᑕᐅᑎᓂᖅ ᓇᒡᓕᒍᓱᖃᑎᒌᖑᐊᓂᒃ ᐊᔾᔨᖑᐊᓂᒃ ᐊᓯᒥᖕᓄᑦ ᐱᕋᔭᖕᓂᐅᔪᖅ ᐊᔾᔨᖑᐊᖅ ᐃᓚᐅᑎᑦᑎᒃᐸᑦ ᐅᑭᐅᑭᓗᐊᖅᑐᒥᒃ. ᐱᕋᔭᖕᓂᐅᖕᒥᔪᖅ ᓇᒃᓯᐅᔾᔨᔨ ᐱᖃᙱᑉᐸᑦ ᐱᖁᔨᓯᒪᔪᒥᒃ ᐃᓄᖕᒥᑦ ᐊᔾᔨᐊᖑᐊᒦᑦᑐᒥᒃ.