ᑐᑭᓯᒋᐊᕆᐊᓪᓚᕕᒃᐃᑦᓯᒎᕐᓂᑯᑦ ᑭᓇᐅᓂᖅ ᓇᒻᒥᓂᖅ ᑕᐅᑐᒍᓯᕗᑦ - ᐊᕐᓇᖅ, ᐊᖑᑎ, ᑕᒪᒋᒃ ᓇᓪᓕᐊᖑᖕᖏᑐᖅ ᑖᒃᑯᐊᓗᓐᓃᑦ ᐊᑯᓐᓂᖏᓐᓂ. ᐃᑦᓯᒎᕐᓂᑯᑦ ᑭᓇᐅᓂᖅ ᐱᐅᓯᖃᕈᑎᕗᑦ, ᐊᓐᓄᕌᕐᓯᒪᒍᓯᕗᑦ ᐊᓯᑦᑎᓄᓪᓗ ᐅᖄᒍᓯᕗᑦ ᑭᓇᐅᓂᑦᑎᓂᒃ. ᐃᓚᖓᓂᒃ ᐃᑦᓯᒎᕐᓂᑯᑦ ᑭᓇᐅᓂᕗᑦ ᐊᑑᑎᔭᕗᓪᓗ ᐊᑦᔨᒌᓲᑦ ᐃᓚᖓᓂᓪᓗ ᐊᑦᔨᐅᒐᑎᒃ.
ᑎᒥᐅᑉ ᑭᓇᐅᓂᖓ ᐃᑦᓯᒎᕐᓂᖓᓄᑦ ᐊᑦᔨᐅᖏᑐᐊᕐᒪᑦ ᓴᕐᕿᔮᕐᑎᑕᐅᓂᖓᓗ ᐃᓚᖓᓂᒃ ᓇᒻᒥᓂᖅ ᓯᐱᓯᒪᔫᓂᕋᓲᑦ. ᐆᑦᑐᕋᐅᑎᒋᓗᒍ ᐊᖑᑎᐅᑦᓱᓂ ᑭᓯᐊᓂ ᓇᒻᒥᓂᖅ ᑕᐅᑐᑦᓱᓂ ᐊᕐᓇᐅᓂᕐᒥᓂᒃ; ᐅᕝᕙᓗᓗᓐᓃᑦ ᐊᕐᓇᐅᓱᓂ ᑎᒥᖓ ᐊᖑᑕᐅᒋᐊᒥᓂᒃ ᑕᑯᓐᓇᓱᓂ. ᓯᐱᔪᕕᓂᖅ ᐃᓅᓕᕐᓯᒪᓂᕋᓲᖅ “ᑕᒻᒪᓯᒪᔪᒥᒃ ᑎᒥᖃᕐᓱᓂ”.
ᓯᐱᓯᒪᔪᑦ, ᐊᑦᔨᐅᖏᑦᑑᒋᐊᒥᓂᒃ ᐃᑉᐱᒋᔭᖃᓲᑦ ᐃᓅᓯᕐᒥᓂ. ᐱᐊᕋᐅᓂᕐᒥᓂᑦ ᐊᑦᔨᐅᖏᑦᑑᓂᕐᒥᓂᒃ ᐃᑉᐱᓂᐊᕐᓱᑎᒃ. ᐅᕕᒃᑲᐅᓕᕐᓱᑎᒃ ᓯᐱᓯᒪᔪᑦ ᐃᓚᓐᓈᒥᓄᑦ, ᐃᓚᒥᓄᑦ ᐊᓯᖏᓐᓄᓗ ᓴᐳᒻᒥᔭᐅᑦᓯᐊᑐᐊᕋᒥᒃ ᐃᓱᕐᕆᓲᑦ. ᐊᔪᕐᓇᒪᒻᒪᕆᐅᒐᓗᐊᖅ ᐊᒥᓱᑦ ᐅᕕᒃᑫᑦ ᐃᓄᒻᒪᕆᒐᓭᑦ ᑭᓇᐅᓂᕐᒥᓂᒃ ᐃᑦᓯᒎᕐᓂᒥᒍᑦ ᓄᐃᑎᑦᓯᑌᓕᓲᑦ ᖃᐅᔨᒪᒐᒥᒃ ᐃᓚᒥᓂᒃ, ᐃᓚᓐᓈᒥᓂᒃ ᓄᓇᓕᒻᒥᓄᓪᓗ ᓲᓱᒋᔭᐅᓂᐊᖕᖏᓂᕐᒥᓂᒃ ᐊᖏᕐᑕᐅᓚᖓᖕᖏᓂᕐᒥᓂᒃ.
ᐃᑦᓯᒎᕐᓂᑯᑦ ᖃᓄᐃᑦᑑᓂᖅ ᐃᓄᐃᑦ ᓂᕆᐅᒋᔭᖏᑦ ᑐᖕᖓᕕᒋᑦᓱᒋᑦ ᐊᑑᑎᑎᑕᐅᓲᖅ “ᐊᖑᑕᐅᓂᖓ” “ᐊᕐᓇᐅᓂᖓ” ᑕᐅᑐᑦᓱᒍ. ᐃᓅᓕᕐᓂᒥᓂᑦ, ᐃᓄᐃᑦ ᑕᐅᑐᓲᑦ ᑐᑭᓯᒪᑦᓱᑎᓪᓗ ᐃᑦᓯᒎᕐᓂᑯᑦ ᖃᓄᐃᑦᑑᓂᕐᒥᒃ ᑐᑭᓯᑦᓱᒍ ᐃᓚᒥᒍᑦ, ᑐᓴᕋᑦᓴᑎᒍᑦ ᐊᓯᖏᑎᒍᓪᓗ ᐃᓅᓯᕐᒥ ᐊᑑᑎᔪᕐᑎᒍᑦ. ᐃᑦᓯᒎᕐᓂᑯᑦ ᖃᓄᐃᑦᑑᓂᖅ ᑐᖕᖓᕕᖃᓪᓚᕆᑦᑐᖅ ᐃᓗᕐᖁᓯᑦᑎᓂᒃ, ‘ᐱᐅᓯᑐᖃᖅ’ ᐊᑐᕐᓱᒍ ᑭᓇᐅᓂᕗᑦ ᐃᓄᑐᐃᓐᓇᐅᓱᑕ ᐃᓄᑐᐃᓐᓇᐅᖏᑦᑐᓂᓪᓗ ᐊᑦᔨᒌᖕᖏᑐᖅ ᐊᒥᓱᑎᒍᑦ. ᐃᑦᓯᒎᕐᓂᑯᑦ ᖃᓄᐃᑦᑑᓂᖅ ᐊᓯᑦᔨᐸᓪᓕᐊᓯᒪᒻᒥᔪᖅ, ᓱᕐᕋᑕᐅᑦᓱᓂ ᖃᕆᑕᐅᔭᕈᑏᑦ ᑐᓴᕈᑏᑦ ᐊᓯᑦᔨᕙᓪᓕᐊᓂᖏᓐᓄᑦ, ᐱᐅᓰᑦ ᐱᒻᒪᕆᐅᔪᖁᑎᒋᔭᐅᔪᓪᓗ, ᐃᓗᕐᖁᓯᖅ, ᐅᖃᐅᓯᖅ ᐊᓯᖏᓪᓗ ᐱᑦᔪᑏᑦ.
ᐅᕕᒃᑲᐅᓂᕐᒥᓂ, ᐊᐱᕐᓱᓯᓲᑦ ᐃᑦᓯᒎᕐᓂᑯᓪᓗ ᖃᓄᐃᑦᑑᓂᐊᕐᓂᒥᓂᒃ ᑐᑭᑖᕐᓱᑎᒃ. ‘ᐱᐅᓯᑐᖃᕐᒥᒃ’ ᐃᓚᖏᑦ ᐊᑑᑎᓲᖑᖕᖏᑐᑦ. ᐆᑦᑐᕋᐅᑎᒋᓗᒍ, ᐅᕕᒃᑫᑦ ᐊᖑᑏᑦ ᐃᒐᒋᐊᒥᒃ, ᒥᕐᓱᕆᐊᒥᒃ ᐱᐊᕋᕐᓂᓗ ᐱᖕᖑᐊᖃᑎᖃᕆᐊᒥᒃ ᐊᓕᐊᒋᔭᖃᓲᑦ; ᐊᕐᓀᑦ ᐅᕕᒃᑫᑦ ᓱᑯᐃᔦᒍᑎᓂᒃ, ᐱᖕᖑᐊᓂᕐᓂᒃ ᒪᙯᓐᓂᒥᓪᓘᓃᑦ ᐱᓯᑎᐅᓲᖑᒻᒥᔪᑦ.
ᐅᕕᒃᑫᑦ ᐱᐅᓯᕆᔭᐅᔪᓂᒃ ᒪᓕᖁᔭᐅᓗᐊᑐᐊᕋᒥᒃ ᐊᔭᐅᕐᑕᐅᓱᑎᒃ ᑭᑦᓴᓂᕐᒦᖃᑦᑕᓲᑦ. ᐅᕕᒃᑲᖅ ᐊᑑᑎᒍᒪᔭᒥᓂᒃ ᐊᑑᑎᒋᐊᓕᒃ ᐊᓕᐊᒋᔭᒥᓂᒃ ᑭᓇᐅᓂᕐᒥᒍᑦ. “ᐊᖑᑕᐅᔭᕈᓂ” “ᐊᕐᓇᐅᔭᕈᓂ” ᐃᑦᓯᒎᕐᓂᑯᑦ ᖃᓄᐃᑦᑑᓂᖓᓂᒃ ᓄᐃᑦᓯᒍᑎᐅᖕᖏᑐᖅ.
ᐅᑯᐊ ᐊᓪᓚᓯᒪᔫᑎᓪᓗᒍ ᑕᑯᓚᐅᕐᓯᒪᑐᐃᓐᓇᕆᐊᓕᓯ LGBTTQA. ᑐᑭᖃᕐᑐᑦ ᙯᕋᔪᐊᑦᑎ, ᒪᓃᓪᓚᑎ, ᑕᒪᓕᒃ, ᒪᕐᕉᓂᒃ ᐊᓂᕐᓂᓕᒃ, ᖃᐅᔨᓇᓱᐊᕐᑐᖅ, ᑕᐱᕇᑦᑐᖅ.
| ᒪᓃᓪᓚᑎ | ᐊᕐᓇᖅ ᐃᑦᓯᒎᕐᓂᑯᑦ ᐊᕐᓇᐅᖃᑎᒥᓂᒃ ᐃᑦᓯᒋᔭᓕᒃ. |
| ᙯᕋᔪᐊᑦᑎ | ᐊᖑᑎ ᐊᖑᑎᐅᖃᑎᒥᓂᒃ ᐃᑦᓯᒎᕐᓂᑯᑦ ᐃᑦᓯᒋᔭᓕᒃ. |
| ᑕᒪᓕᒃ | ᑕᒪᒋᓐᓂᒃ ᐃᑦᓯᒋᔭᓕᒃ - ᐊᖑᑎᐅᒍᓂ ᐊᕐᓇᓂ - ᐊᖑᑎᓂᓪᓗ ᐃᑦᓯᒍᓱᑦᑐᖅ, ᐊᕐᓇᐅᒍᓂ ᐊᖑᑎᓂᒃ ᐊᕐᓇᓂᓪᓗ ᐃᑦᓯᒍᓱᑦᑐᖅ. |
| ᓯᐱᓯᒪᔪᖅ ᐅᕝᕙᓗᓗᓐᓃᑦ ᐃᑦᓯᒎᕐᓂᒥᒍᑦ ᓯᐱᓯᒪᔪᖅ | ᐃᓅᓕᕐᑐᕕᓂᖅ ᐊᕐᓇᐅᓱᓂ ᐊᖑᑎᐅᒋᐊᒥᓂᒃ ᐃᑉᐱᒋᔭᓕᒃ; ᐊᖑᑎᐅᑦᓱᓂ ᐃᓅᓕᕐᑐᕕᓂᖅ ᐊᕐᓇᐅᒋᐊᒥᓂᒃ ᐃᑉᐱᒋᔭᓕᒃ. ᑖᒃᑯᐊ ᐃᑦᓯᒎᕐᓂᒥᒍᑦ ᑭᓇᐅᓂᕐᒥᓂᒃ ᓄᐃᑕᑎᑦᓯᒍᑎᖏᑦ, ᐃᑦᓯᒎᕐᓂᑯᑦ ᖃᓄᐃᑦᑑᓂᕐᒥᓂᐅᖕᖏᑐᖅ. ᐊᕐᓇᐅᓱᓂ ᐃᓅᓕᕐᑐᕕᓂᖅ ᐊᖑᑎᓃᒍᓐᓇᑐᖅ ᐊᕐᓇᐅᖃᑎᒥᓂᓪᓘᓃᑦ; ᐊᖑᑎᐅᑦᓱᓂ ᐃᓅᓕᕐᑐᕕᓂᖅ ᐊᖑᑎᐅᖃᑎᒥᓃᒍᓐᓇᑐᖅ ᐊᕐᓇᓂᓪᓘᓃᑦ. |
| ᒪᕐᕉᓂᒃ ᐊᓂᕐᓂᓕᒃᒃ | ᓄᓇᓕᑐᙯᑦ ᒪᓃᓪᓚᑎᐅᒍᓐᓇᑐᑦ, ᙯᕋᔪᐊᑦᑎᐅᓗᑎᒃ, ᓯᐱᒪᔫᓗᑎᒃ ᐊᓯᖓᓂᓪᓘᓃᑦ. |
| ᖃᐅᔨᓇᓱᐊᕐᑐᖅ | ᖃᐅᔨᒪᑦᓯᐊᖏᑦᑐᖅ ᐃᑦᓯᒎᕐᓂᒥᒍᑦ ᖃᓄᐃᑦᑑᓂᕐᒥᓂᒃ ᑭᓇᐅᓂᕐᒥᓂᒃ. |
| ᑕᐱᕇᑦᑐᖅ | ᑖᒃᑯᐊ ᓇᓪᓕᖏᓐᓂᒃ ᐊᑑᑎᓲᖑᒐᓂ ᓴᐳᒻᒥᔨ ᐃᑲᔪᕐᑎᐅᓱᓂA LGBTTQ-ᓂᒃ ᐱᒍᓐᓇᐅᑎᖏᓐᓂᓗ ᓴᐳᒻᒥᒐᓱᐊᖃᑎᐅᓲᖑᑦᓱᓂ. |
ᐃᓅᖃᑎᒌᓐᓂᑎᓐᓂ, LGBTTQ ᐱᐅᓯᓖᑦ ᐊᑑᑎᒍᒪᖕᖏᑕᒥᓂᒃ ᐊᑑᑎᖁᔭᐅᑦᓱᑎᒃ ᐊᔭᐅᕐᑕᐅᓂᕐᒥᓂᒃ ᐃᑉᐱᒋᔭᖃᓲᑦ. ᑌᒣᑦᑑᖏᓐᓂᕋᖃᑦᑕᓱᑎᒃ, ᐃᔨᕐᓯᒪᑦᓱᑎᒃ ᐃᓗᕐᖁᓯᕐᒥᒍᑦ ᐅᖃᐅᑕᐅᖕᖏᓂᑯᖓᓄᑦ ᐃᓄᐃᓪᓗ ᐱᐅᓯᖏᓐᓄᑦ. ᐃᓚᒌᓂ ᐃᓚᖏᓐᓂ ᓄᓇᓕᓐᓂᓗ ᓲᓱᒋᔭᐅᓂᖃᓲᖑᖕᖏᑐᑦ, ᓵᓚᕐᖃᖑᑦᓱᑎᒃ ᐱᓗᑲᑕᐅᑦᓱᑎᓗᓐᓃᑦ ᑌᒣᑦᑑᑐᐊᕐᒪᑕ.
ᐅᕕᒃᑲᐅᓂᕐᒥᓂ LGBTTQ ᐃᑉᐱᒋᓪᒪᕆᑦᑕᒥᓂᒃ ᐊᑑᑎᑎᑦᓯᑌᓕᓲᑦ ᐅᕝᕙᓗᓗᓐᓃᑦ ᐱᐅᓯᕆᒍᒪᖕᖏᑕᒥᓂᒃ ᐊᑑᑎᖕᖑᐊᓱᑎᒃ. ᓴᓪᓗᓂᕐᒥᒃ ᐃᓅᓯᖃᓕᕐᓱᑎᒃ; ᑭᓇᓪᓚᕆᐅᓂᕐᒥᓂᒃ ᐃᔨᕐᓯᒪᑦᓯᓱᑎᒃ, ᐃᓚᒥᓂᑦ ᐃᓚᓐᓈᒥᓂᓪᓗ.
ᑕᒡᒎᓇᑦᓭᓇᕐᓗ, ᐃᓅᖃᑎᒌᑦ ᓲᓱᑦᓴᕆᐅᕐᐸᓕᐊᔪᑦ ᒪᑐᐃᖕᖔᕕᖃᕐᓂᓴᐅᓕᕐᓱᑎᓪᓗ ᐊᑦᔨᒌᖕᖏᑐᓂᑦ ᐃᑦᓯᒎᕐᓂᖃᕐᓂᓕᓐᓂᒃ ᐃᑦᓯᒎᕐᓂᒥᒍᓪᓗ ᑭᓇᐅᓂᖏᓐᓂᒃ. LGBTTQ ᐅᖄᓕᑐᐊᕋᒥᒃ ᐅᓂᒃᑳᓲᑦ ᐃᑦᓯᒎᕐᕈᓯᕐᒥᓂᒃ ᑭᓇᐅᓂᕐᒥᓂᓪᓗ. ᐃᓚᒥᓄᑦ ᐃᓚᓐᓈᒥᓄᓪᓗ ᐅᖃᕐᓯᒪᒐᔭᕐᑐᑦ ᐅᕝᕙᓗᓗᓐᓃᑦ ᐃᓄᓕᒫᓄᑦ ᖃᐅᔨᒪᔭᐅᑎᑦᓯᐊᕖᖕᖓᓗᑎᒃ.
ᐃᓚᒋᔭᓄᑦ, ᐃᓚᓐᓈᕆᔭᓄᑦ ᓄᓇᓕᒻᒧᓗ ᓴᐳᒻᒥᔭᐅᓂᖅ ᐱᒻᒪᕆᐅᔪᖅ. LGBTTQ ᐅᕕᒃᑲᐅᓱᑎᒃ ᐃᑲᔪᕐᑕᐅᓯᐊᖕᖏᑐᐊᕋᒥᒃ ᐃᓕᓐᓂᐊᑕᒥᓂᒃ ᓄᕐᙯᓇᕈᓪᓕᐅᓲᑦ, ᐋᖓᔮᓐᓇᑐᕐᑐᑎᐅᑦᓱᑎᒃ ᐃᒥᐊᓗᑦᑎᐅᓱᑎᒃ, ᑭᑦᓴᐸᑦᓱᑎᒃ ᐃᒻᒥᓂᐊᕐᐸᓱᑎᐊᓪᓛᑦ.
ᓲᓱᑦᓴᓯᐊᕆᐊᖃᕐᐳᒍᑦ ᐃᑲᔪᕐᓯᒪᓗᑕᓗ ᐃᓄᓕᒫᓂᒃ, ᐃᑦᓯᒎᕐᓂᒥᒍᑦ ᖃᓄᐃᑦᑐᒐᓗᐊᕐᐸᑕ.