ᖁᐱᕐᕆᓯᒪᓂᖅ ᓴᙱᒃᑎᑉᐸᓪᓕᐊᓲᒥᒃ ᓯᐊᒻᒪᑉᐸᓕᐊᓂᖓ ᓄᓇᕘᒥ

ᖁᐱᕐᕆᓯᒪᓂᖅ ᓴᙱᒃᑎᑉᐸᓪᓕᐊᓲᒥᒃ ᐋᓐᓂᐊᕌᓘᔪᖅ ᓯᐊᒻᒪᖃᑦᑕᖅᑐᖅ ᑯᔭᓐᓂᒃᑯᑦ. ᖁᐱᕐᕆᓯᒪᓂᐅᔪᖅ ᑐᓐᓂᖅᑯᑕᐅᔪᓐᓇᕆᕗᖅ ᓇᔾᔨᔪᒥᑦ ᓇᔾᔨᐊᕐᒥᓄᑦ.

ᖁᐱᕐᕆᓯᒪᓂᖅ ᓴᙱᒃᑎᑉᐸᓪᓕᐊᓲᒥᒃ ᑕᑯᔭᐅᒐᔪᓚᐅᙱᑦᑑᒐᓗᐊᖅ ᓄᓇᕘᒥ, ᑭᓯᐊᓂ ᑕᐃᒪᙵᓂ 2012ᒥ 90-ᐅᖓᑖᓄᑦ ᐃᓄᖕᓂᒃ ᓇᓗᓇᐃᖅᓯᓯᒪᓕᖅᑐᑦ ᓄᓇᓖᑦ ᐊᔾᔨᒌᙱᑦᑐᓂᒃ ᑖᓐᓇᓗ ᓈᓴᐅᑎ ᐊᒥᓱᙳᖅᐸᓪᓕᐊᑐᐃᓐᓇᖅᑐᖅ. ᖁᐱᕐᕆᓯᒪᓂᖅ ᓴᙱᒃᑎᑉᐸᓪᓕᐊᓲᒥᒃ ᑭᓇᑐᐃᓐᓇᕐᒥᑦ ᐊᒃᑐᐃᓂᖃᕈᓐᓇᖅᑐᖅ: ᐃᓅᓱᒃᑐᓂᑦ ᐃᓐᓇᕐᓂᓗ, ᐊᖑᑎᓂᑦ ᐊᕐᓇᓂᓪᓗ.

ᖁᐱᕐᕆᓯᒪᓂᖅ ᓴᙱᒃᑎᑉᐸᓪᓕᐊᓲᒥᒃ ᐋᓐᓂᐊᕈᑕᐅᖃᑦᑕᖅᑐᑦ ᐃᓚᖃᕈᓐᓇᖅᑐᖅ ᐅᕕᓂᒃᑯᑦ ᖃᑦᑎᓐᓂᖃᕐᓗᓂ ᐅᕝᕙᓘᓐᓃᑦ ᐊᒻᒪᑎᕐᓂᖃᕐᓗᓂ ᐊᒻᒪᓂᒃᑯᑦ ᖃᓂᒃᑯᓘᓐᓃᑦ, ᐊᒻᒪᓗ ᐅᕕᓂᒃᑯᑦ ᐊᐅᐸᒐᓛᓪᓗᓂ. ᐃᓄᒋᐊᒃᑐᑦ ᖁᐱᕐᕆᓯᒪᔪᑦ ᓴᙱᒃᑎᑉᐸᓪᓕᐊᓲᒥᒃ ᖃᓄᐃᔾᔪᑎᖃᑉᐸᖏᑦᑐᑦ, ᑕᐃᒪᐃᓐᓂᖓᓄᑦ ᐱᒻᒪᕆᐅᕗᖅ ᖃᐅᔨᓴᖅᑕᐅᓵᓕᓗᓂ. ᐋᓐᓂᐊᕐᕕᓯ ᖃᐅᔨᒋᐊᕐᕕᒋᓗᒍ ᐅᕝᕙᓘᓐᓃᑦ ᐅᖁᒪᐃᓐᓂᕐᓂᐊᕐᕕᖕᒧᑦ ᐊᑭᖃᙱᑦᑐᒥᑦ ᐊᒻᒪᓗ ᑲᙳᓇᖅᑐᒃᑯᑦ ᖁᐱᕐᕆᓯᒪᓂᕐᒧᑦ ᓴᙱᒃᑎᑉᐸᓪᓕᐊᓲᒥᒃ ᐊᐅᒃᑯᑦ ᖃᐅᔨᓴᖅᑕᐅᓂᕐᒥᑦ.

ᓱᕈᖅᓯᒪᓂᖅ ᐃᒻᒥᓂ ᐊᓯᐅᖃᑦᑕᖏᑦᑐᖅ, ᐋᓐᓂᐊᕈᑕᐅᖃᑦᑕᖅᑐᑦ ᓄᖅᑲᕋᓗᐊᖅᑎᓪᓗᒋᑦ. ᖁᐱᕐᕆᓯᒪᓂᖅ ᓴᙱᒃᑎᑉᐸᓪᓕᐊᓲᒥᒃ ᐃᓅᓕᓴᖅᑕᐅᒋᐊᖃᖅᑐᖅ ᐄᔭᒐᕐᓄᑦ. ᒪᒥᓴᖅᑕᐅᙱᑉᐸᑦ, ᐱᐅᒍᓐᓃᑎᑦᓯᒻᒪᕆᒍᓐᓇᖅᑐᖅ ᐆᒻᒪᑎᒥᑦ ᖃᕋᓴᕐᒥᓗ, ᐊᒻᒪᓗ ᑐᖁᔾᔪᑕᐅᑐᐃᓐᓇᕆᐊᖃᖅᑐᖅ.

ᐱᐅᓛᖑᕗᖅ ᖁᐱᕐᕆᑦᑕᐃᓕᒪᓂᕐᒥᑦ ᓴᙱᒃᑎᑉᐸᓪᓕᐊᓲᒥᒃ ᐊᑦᑕᕐᓇᙱᑦᑐᒃᑯᑦ ᑯᔭᓐᓂᒃᑯᑦ, ᓲᕐᓗ ᐅᓲᑉ ᐴᖓᓂ ᐊᑐᕐᓗᓂ. ᐋᓐᓂᐊᖅᑐᓕᕆᔨᓯ ᐅᖃᖃᑎᒋᓗᒍ ᑐᑭᓯᒋᐊᒃᑲᓐᓂᕈᒪᒍᕕᑦ.
ᐱᓕᕆᖃᑎᒌᓪᓗᑕ ᓄᖅᑲᖅᑎᒍᓐᓇᖅᑕᕗᑦ ᖁᐱᕐᕆᓂᐅᔪᖅ ᓴᙱᒃᑎᑉᐸᓪᓕᐊᓲᒥᒃ ᓄᓇᓕᑦᑎᓐᓂᒃ.

ᖃᐅᔨᓴᖅᑕᐅᒋᑦ. ᐃᓅᓕᓴᖅᑕᐅᒋᑦ.

ᐋᓐᓂᐊᖅᑐᓕᕆᔨᒻᒪᕆᐅᑉ ᐊᓪᓚᕝᕕᖓ, ᓄᓇᕗᑦ

###

ᑐᓴᒐᒃᓴᒧᑦ ᑐᑭᓯᒋᐊᕐᕕᒃ:
ᕌᓐ ᐅᐊᓯᖕᒃ
ᑐᓴᒐᒃᓴᓕᕆᔨ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
ᐅᖃᓘᑖ: (867) 975-5710
ᐃᕐᖐᓐᓇᒃᑰᕈᑖ: rwassink@gov.nu.ca